هاتووچۆی بازرگانی له‌مه‌رزی په‌روێزخان وه‌ستا

هاتووچۆی بازرگانی له‌مه‌رزی په‌روێزخان وه‌ستا
مه‌وداپرێس-سازگار ئه‌حمه‌د

وته‌بێژی مه‌رزی نێوده‌وڵه‌تی په‌روێزخان رایگه‌یاند سه‌رله‌به‌یانی ئه‌مڕۆ 15ی نیسانی 2019 شۆفێرانی مه‌رزی په‌روێزخان مانیانگرت به‌هۆی ئه‌وه‌ی کۆمه‌ڵی داواکاریان هه‌بوو هاتووچۆی بازرگانی له‌ مه‌رزه‌که‌ وه‌ستابوو ئاماژه‌ی به‌وه‌شکرد که‌ کۆماری ئیسلامی ئێران به‌ڵێنی چاره‌سه‌رکردنی گرفته‌کانیان پێداون.

ئارام سایه‌خان وته‌بێژی مه‌رزی نێوده‌وڵه‌تی په‌روێزخان تایبه‌ت به‌ مه‌وداپرێس راگه‌یاند "سه‌رله‌به‌یانی ئه‌مڕۆ 15ی نیسانی 2019 شۆفێرانی مه‌رزی په‌روێزخان مانیانگرت به‌هۆی ئه‌وه‌ی کۆمه‌ڵی داواکاریان هه‌بوو هاتووچۆی بازرگانی له‌ مه‌رزه‌که‌ وه‌ستابوو به‌ڵام هاتووچۆی گه‌شتیاران به‌رده‌وام بوو".

وته‌بێژی مه‌رزی په‌روێزخان وتیشی "داواکاری شۆفێران بریتی بوون له‌وه‌ی که‌ توندوتۆڵی له‌ خاڵه‌ پشکنینه‌کانی وڵاتی ئێران که‌م بکرێته‌وه چونکه‌ کاتێکی زۆریان پێده‌چێت له‌کاتی گواستنه‌وه‌ی که‌لوپه‌ل واده‌کات دره‌نگ بگه‌نه‌وه‌ ماڵه‌کانیان‌ و نوێنه‌ر زیادبکرێت و رێگاوبانه‌کانیشیان بۆ چاکبکرێته‌وه‌".

ئارام سایه‌خان ئاماژه‌ی به‌وه‌کرد "بۆ ئه‌و مه‌به‌سته‌ سه‌ردانی کۆماری ئیسلامی ئێرانمان کردووه‌ و له‌گه‌ڵ لایه‌نی په‌یوه‌ندیداردا گفتوگۆمان کردووه‌ و به‌ڵێنیان پێ داوین نوێنه‌ری تایبه‌تی بۆ خاڵه‌ پشکنینه‌کان زیاد بکه‌ن بۆ ئه‌وه‌ی گرفته‌کانی ئه‌و شۆفێرانه‌ چاره‌سه‌ر بکرێت".

ناوبراو ئه‌وه‌شی خسته‌ڕوو "که‌ له‌  ئێستادا هاتووچۆی بازرگانی له‌ مه‌رزی په‌روێزخان ده‌ستی پێکردۆته‌وه‌".



PM:09:42:15/04/2019




ئه‌م بابه‌ته 572 جار خوێنراوه‌ته‌وه‌‌