بكوژی شوفێرەكەی هەولێر دەستگیر كرا

بكوژی شوفێرەكەی هەولێر دەستگیر كرا
مەوداپرێس-
  

بەڕێوەبەری پۆلیسی هەولێر ئاشكرایكرد، ئەو كەسەی دوێنێ لە هەولێر شوفێرێكی كوشت، دەستگیر كراوەو هاوكات لە ماوەی هەفتەیەكدا چەند تۆمەتبارێكی دیكەیان دەستگیر كردووە.

عەبدولخالق تەڵعەت، بەرێوەبەری پۆلیسی هەولێر لەكۆنگرەیەكی رۆژنامەوانیدا ئەمڕۆ چوارشەممە رایگەیاند "دوای ئەوەی دوێنێ لە كاتی رووداوێكی هاتووچۆدا لە هەولێر، شوفێرێك بە ناوی محەمەد عەبدولعەزیز، بە دەمانچە تەقەی لە شوفێرێكی دیكە بە ناوی هیشام ئیسماعیل كرد و كوشتی، دواتر خۆی رادەستی پۆلیس كرد و ئێستا دەستگیر كراوە و دەدرێتە دادگا".

دوێنی سێشەممە 11/6/2019، لە فولكەی بازی سەر رێگەی مووسڵی شاری هەولێر، رووداوێكی پێكدادان لەنێوان دوو ئۆتۆمبێل رووی دا، دوای دەمەقاڵە لەنێوان شوفێرانی ھەردوو ئۆتۆمبێلەكە، یەكێك لە شوفێرەكان بە دەمانچە تەقەی لەوەی دیكە كرد و برینداری كرد، پێش گەیاندنی بۆ نەخۆشخانە گیانی لە دەست دا.

بەڕێوەبەری پۆلیسی هەولێر وتیشی: "چەند تۆمەتبارێكی دیكە دەستگیر كراون، دەست بەسەر چەند پارچە چەك و ژمارەی ساختەی ئۆتۆمبێلدا گیراوە و پەڕاوی لێكۆڵینەوە بۆ تۆمەتباران كراوەتەوە".

بەرێوەبەری پۆلیسی هەولێر ئاماژەی بەوەشكرد "چەند تاوانێك بەو ئۆتۆمبێلانەی ژمارەی ساختەیان هەبووە ئەنجام دراون، كە لێكۆڵینەوەمان دەكرد ئۆتۆمبێلەكان ئەوەلیاتیان نەبوو، دواتر بۆمان دەركەوت كە ژمارەی ساختەیان بۆ ئۆتۆمبێلەكان دروست كردووە".

 



PM:05:50:12/06/2019




ئه‌م بابه‌ته 392 جار خوێنراوه‌ته‌وه‌‌