بەغدا و هەولێر..
خواست بۆ رێككەوتن و نەبوونی متمانە

بەغدا و هەولێر..<br>
خواست بۆ رێككەوتن و نەبوونی متمانە
مەوداپرێس- رەنگین عارف

سەردانی وەفدی بەغدا بۆ هەرێمی كوردستان رێککەوتنێکی سیاسیی سەرەتایی لێکەوتووەتەوە و بڕیاریش وایە دوای درووستکردنی لیژنەکان و لێکۆڵینەوەی زیاتر رێککەوتنەکە گشتگیرتر بکرێت و بکرێتە رەسمی، کە چەندان بواری سیاسی و ئابووری و دارایی دەگرێتەوە.

رۆژی پێنجشەممەی رابردوو وەفدێکی حکومەتی ناوەند سەردانی هەولێری کرد و لەگەڵ بەرپرسانی حکومەتی هەرێم کۆبوونەوە، هاتنی ئەو وەفدە لەکاتێکدایە لە سەرەتای پێکهێنانی کابینەی نوێدا حکومەتی هەرێم سەردانی بەغدای کرد و نییەتی چارەسەرکردنی کێشەکانی لەگەڵ بەغدا یەکلاییکردەوە و بڕیاریش وایە رێککەوتنەکە پێش ساڵی نوێ ئەنجام بدرێت.

سەرچاوەیەکی ئەنجوومەنی وەزیرانی هەرێمی كوردستان کە نەیویست ناوی ئاشکرا بکرێت بە مەوداپرێسی راگەیاند "کۆبوونەوەکان زۆر گرنگ و باش بوون، هەرێم و بەغداش پەرۆشن بۆ کۆتاییهێنان بە پرسە هەڵواسراوەکانی نێوانیان و رێککەوتنێک بکەن کە بۆ ماوەی چوار ساڵ کەمتر نەبێت".

ئەو سەرچاوەیە وتیشی "رێککەوتنێکی سەرەتایی کراوە، هەرێم لە سەرەتای ساڵی نوێوە 250 هەزار بەرمیل نەوت رادەستی بەغدا بکات و ئەوانیش مووچەی فەرمانبەران و پێشمەرگە بە بەردەوامی و لەکاتی خۆیدا بنێرن و ئەو سێ مووچەیەی ئەمساڵیش کە نەنێردراون بەسەر یەکەوە بنێردرێن پێش سەرەتای ساڵی نوێ، وەفدەکەی بەغداش رەزامەندییان نیشان داوە."
هەرێم و ناوەند لە ساڵی 2014ەوە پەیوەندییە سیاسی و داراییەکانی نێوانیان تێکچووە و لە سەرەتای 2019ەیشەوە پەیوەندییەکان روویان لە ئاساییبوونەوە کردووە.

"پێشنیازێکی تریش هەیە هەرێم تەواوی نەوتەکەی رادەستی بەغدا بکات لە بەرانبەر بەرزکردنەوەی بودجەی هەرێمی كوردستان بۆ 17% و ناردنی بەشێوەی ساڵانی رابردوو."

بەپێی زانیارییەکانی مەوداپرێس، لە کۆبوونەوەکەدا جگە لە پرسی دارایی، پرسی سیاسی، وەک چۆنیەتی مامەڵەکردن لەگەڵ پارتی کرێکارانی کوردستان، هەروەها کێشەی سنوورەکان و ناوچە کوردستانییەکانی دەرەوەی ئیدارەی هەرێمیش گفتوگۆیان لە بارەوە کراوە.

ڤیان سەبری، سەرۆکی فراکسیۆنی پارتی دیموکراتی کوردستان لە پەرلەمانی عیراق بە مەوداپرێسی راگەیاند "حکومەتی هەرێم کاتێک سەردانی بەغدایان کرد دوو شتیان بەڕاشکاوی بە حکومەتی عیراق گەیاند، ئەوانیش پەلەکردن لە چارەسەرکردنی کێشەکان و ئامادەیی تەواوی هەرێم بۆ رێککەوتن لەگەڵ حکومەتی ناوەند".

وتیشی "ئەو وەفدەی حکومەتی بەغدا کە هاتووە بۆ هەولێر گرنگە و بڕیاری درووستکردنی چەند لیژنەیەک دراوە لەسەر هەموو پرسەکان، چەند پێشنیازێکیش هەیە بۆ رێککەوتنی چوار ساڵی نێوان هەرێم و بەغدا و لە نێوان هەردوولادا هاوتەریب بە کاری لیژنەکان تاووتوێ دەکرێت."
ترسێک هەیە لەوەی هەردوو لایەنی هەرێم و بەغدا دەستی دەستی بە یەکتر بکەن و نییەتی راستەقینەی چاکسازی بوونی نەبێت، ئەوەش بە تایبەت بۆ هەرێمی کوردستان دەبێتە کێشە.

ئارێز عەبدوڵڵا، ئەندامی سەركردایەتی یەكێتیی نیشتیمانیی كوردستان كە هاوكات لە خولی پێشووی پەرلەمانی عیراقدا سەرۆكی فراكسیۆنی حزبەكەی بوو بە مەودا پرێسی راگەیاند "ئەوەی تائێستا لە هاتنی وەفدەکانی هەرێم و بەغدا بۆ لای یەکتری بەدی دەکرێن تەنها هەوڵن، کاتێک ئومێد درووست دەبێت کە بڕیار بدرێت ئەو بڕیارانەشی لەو کۆبوونەوانەدا دراون تەنها بڕیاری درووستکردنی لیژنە و بەدواداچوونن".

وتیشی: "نە لە لایەن هەرێم و نە لە لایەن بەغدا نییەتی رێککەوتن نییە، هەردوولا دەستی دەستی بە یەکتری دەکەن و دەیانەوێت رێککەوتنەکە بۆ کاتێکی گونجاو بۆ خۆیان دوا بخەن، هەندێ لایەنی عیراقیش هەیە نەک نایەوێت ئەو رێککەوتنە بکرێت، بەڵکوو دەیانەوێت هەموو دەستکەوتێکی هەرێم لەناوبەرن."

لە ماوەی چوار ساڵی رابردوودا کە هەرێم و بەغدا پەیوەندییەکانیان ئاڵۆز بوون، هەرێم دووچاری قەیرانی دارایی قووڵ بووەوە و تائێستاش قەیرانەکە بە تەواوی تێنەپەڕێندراوە.

"ئەوەی کە سەختە لەنێوان هەرێم و بەغدا درووست ببێتەوە متمانەیە، هیچ لایەکیان متمانەیان بەوی تریان نییە، ئەگەرنا ئەو هەموو کۆبوونەوە و لیژنە و لیژنەکارییە تەنها هۆکاری نەبوونی متمانەیە و ئاسانیش درووست ناکرێتەوە." ئارێز عەبدوڵڵا وای وت.


PM:01:53:30/07/2019




ئه‌م بابه‌ته 512 جار خوێنراوه‌ته‌وه‌‌