كورسی كۆتاكان كێشە دەخاتە نێوان فراكسیۆنەكانەوە

كورسی كۆتاكان كێشە دەخاتە نێوان فراكسیۆنەكانەوە
مەوداپرێس_ کاروان رەسوڵ

فراکسیۆنی ئەنجوومەنی کلدان و ئاشوری رایدەگەیەنێت دژی هەر پرۆژە یاسایەکین کە ئامانج لێ کەمکردنەوە کورسی کۆتای کەمەنەتەوەکان بێت، لەلایەکی تریشەوە فراکسیۆنی بزووتنەوەی گۆڕن ئاماژە بەوەدەکات پێشکەشکردنی پڕژە یاسا بۆ کەمکردنەوەی کورسی کۆتاکان لە پەرلەمانی کوردستان کاری سیاسییەکانی گۆڕانە، فراکسیۆنی پارتیی دیموکراتیی کوردستان هەرگیز لەگەل پڕۆژە یاسای کەمکردنەوەی کورسی کۆتاکانین.

11 کورسی کۆتاکان بۆ خولی پێنجەمی هەڵبژێردراوی پەرلەمانی کوردستان بەم شێوەیە دابەش بووە پێنچ کورسی بۆ پێکهاتەی تورکمانی، پێنج کورسی بۆ ئاشوری و یەک کورسی بۆ ئەرمەنی دیاریکراوە، lلە خۆلی یەکەمی پەرلەمان لە سالی 1992 لە کۆی 105  کورسی تەنها 5 کورسی بۆ کۆتای کەمەنەتەوەکان دیری کرابوو.

کلارا عۆدیشۆ سەرۆکی فراکسیۆنی ئەنجوومەنی کلدان و ئاشوری بە مەوداپرێسی راگەیاند "چاوەڕێ سەرژمێری ساڵی 2020 ین تاوەکو ژمارەی راستی کلادان و ئاشوریەکان ئاشکرابێت تا کورسییەکانمان زیادبێت".

کلارا عۆدیشۆ ئاماژەی بەوەشکرد "کلادان و ئاشوریەکان خاوەنی پێنج کورسی پەرلەمانن ئێمە بە کەمی دەزانین دەمانەوێت زیاتر بێت".

وتیشی "دژی هەر پرۆژە یاسایاکین بۆ کەمکردنەوەی کورسی کۆتاکان و قبوڵی ناکەین".  

ئەگەر بڕوانین به‌ پێی یاسا، له‌ ئه‌نجوومه‌نی نوێنه‌رانی عێراق له‌کۆی 325 کورسی 7 کورسی کۆتاکان هه‌یه‌،لە بەغدا 1 کورسی بۆ پێکھاتەی مەسیحی، وە 1 کورسی بۆ پێکھاتەی سابئە، لە مووسڵ 1 کورسی بۆ پێکھاتەی مەسیحی و 1 کورسی بۆ پێکھاتەی یەزیدی وە 1 کورسی بۆ پێکھاتەی شەبەک، لە کرکوک 1 کورسی بۆ پێکھاتەی مەسیحی، لە دھۆک 1 کورسی بۆ پێکھاتەی مەسیحی، لە ھەولێر 1 کورسی بۆ پێکھاتەی مەسیحی.

جەلال محەمەد ئەندامی پەرلەمانی کوردستان لە فراکسۆنی گۆڕان بە مەوداپرێسی وت "هیچ پڕۆژە یاسایەکی لەو جۆرەمان پێشکەش نەکردووە و لە خولەکانی پێشوش ئاگادار نیم".

جەلال محەمەد وتیشی "بۆ ئەو پڕۆژە یاسایە دەبێت سیاسییەکانی گۆڕان بڕیاربدەن، ئەوەندەی شتێکی سیاسییە شتێکی قانونی نییە".

لە خولی چوارەمی پەرلەمانی کوردستان دەنگۆیەکی فراوان هەبوو بۆ پێشکەشکردنی پڕۆژە یاسایەک تاوەکو کورسی کۆتاکان کەمبکرێتەوە، چونکەی لایەنی ئۆپۆزسیۆن پێیان وابوو دەسەڵات بۆ بەرژەوەندی خۆیان بەکاریان دێنن هەرکات بیانەوێت

حەسیبە گەردی ئەندامی پەرلەمانی کوردستان لە فراکسیۆنی پارتیی دیموکراتیی کوردستان بە مەوداپرێسی راگەیاند "هیچ پرۆژە یاسایەکمان نیە بۆ دەستکاری کردنی کورسی کۆتای کەمە نەتەوەکان".

وتیشی "هەرگیز بەهیچ شێوەیەک لەگەڵ کەمکردنەوەی ماف و ئیمتیازیان نین"

دکتۆر فایەق محەمەد چاودێری سیاسی پێشتر بە راگەیاندنەکانی وتبوو "بەخشینی ئەو ژمارە زۆرەی کورسی پەرلەمان بۆ تورکمان و ئاسوری و کلدان،هۆکارەکەی سیاسیە، بۆ رازیکردنی ولاتانی دراوسێ و زلهێزەکانی جیهانە، پێدانی ٥ پێنج کورسی بە تورکمانەکانی هەرێمی کوردستان بۆ رازیکردنی ولاتی تورکیایە".

زۆرێک لە وڵاتان لە یاسای هەڵبژاردنیدا، رازی نین بە سیستمی کۆتا و ئیشی پێناکەن، پاساویان بۆ ئەو رازی نەبوونە، ئەوەیە کە ناکۆکە لەگەڵ مادەیەکی گرنگی دەستوری کە بریتییە لە پرنسیپی یەکسانی. بۆ نموونە یاسای هەڵبژاردن لەم وڵاتانەدا، کار بە سیستمی کۆتا ناکەن: تونس، جەزائیر، یەمەن، لوبنان، کوێت، سعودییە، قەتەر، بەحرێن، ئیمارات، مۆرتانیا، سوریا، ئەمریکا، هند، ئوستورالیا، کەنەدا.

قارەمان قادر ئەندامی فراکسیۆنی گۆڕان لە خولی سێەمی پەرلەمانی کوردستان  رایگەیاندبوو "ئەو سیستمی کۆتایەی لەڕابردوودا دانراوە، ویستی ھەندێک لایەنی سیاسی بووەو پێویستە دەستکاری بکرێت".

پەرلەمانتارەکەی گۆڕان وتوشەتێ "ناکرێت رێژەی دەنگەکانی نەتەوەیەک بەئەندازەی دوو کورسی پەرلەمانی بێت، بەڵام پێنج کورسی بۆ دابنرێت، بۆیە گرنگە پێداچوونەوە بەکۆتای کەمە نەتەوەکاندا بکرێت و رێژەیەکی شایستەیان بۆ دابنرێت".


PM:08:33:04/08/2019




ئه‌م بابه‌ته 1956 جار خوێنراوه‌ته‌وه‌‌