پەیوەندی تورکیی ـ ئەمریکیی
ترەمپ سەردانی تورکیا دەکات

پەیوەندی تورکیی ـ ئەمریکیی<br>
ترەمپ سەردانی تورکیا دەکات
مەوداپرێس ـ 

میدیای تورکیی هەواڵی کۆبونەوەى نێوان سەرۆکی تورکیا و وەزیری بازرگانی ئەمریکایان بڵاوکردەوە و لەو چوارچێوەیەدا زانیاریی بەرچاویان سەبارەت بە پەیوەندیەکانی نێوانیان لەزاری رەجەب تەیب ئەردۆغانەوە بڵاوکردەوە. 

ئاژانسى هەواڵی ئەنادۆڵی تورکیی کە ئاژانسێکی رەسمی وڵاتە بڵاویکردەوە، رەجەب تەیب ئەردۆغان سەرۆک کۆماری تورکیا، لە کۆشکی کۆماری پێشوازی کرد لە  ویلبور رۆس وەزیری بازرگانی ئەمریکا و شاندی یاوەری، لەو چوارچێوەیەدا رایگەیاندووە "لەگەڵ ترەمپ-ی دۆستمدا باسمان لە پرسی دەستپێکردنی دانوستانەکانی رێککەوتنی بازرگانی ئازاد کرد. لەم بارەیەوە وەزیرە پەیوەندیدارەکانمان دەست دەکەن بە کارەکانیان".

رەجەب تەیب ئەردۆغان سەردانەکەی بە هۆکارێکی گرنگ وەسف کرد بۆ نیشاندانی ئیرادەی بەهێزی گەیاندنی پەیامی هاریکاری بازرگانی و ئابووری نێوان هەردوو وڵات و وتی: "تورکیا و ئەمریکا خاوەن پەیوەندییەکی بەهێزی هاوپەیمانیین لەسەر بنەمای بەرژەوەندی هاوبەش و بەها هاوبەشەکان. ئەم هاوپەیمانێتییە ناوبەناو لە رێی ئاستەنگییەکانەوە بە تاقیکردنەوەی قورسدا تێپەڕیوە، زۆر لەمپەڕی تێپەڕاندووە.، بەڵام لەگەڵ سەرکەوتن بەسەر هەر ناڕەحەتیەکدا، پەیوەندی هاوپەیمانێتییمان بەهێز تر بووە.

بەگوێرەی میدیای تورکیی، سەرۆک کۆماری تورکیا وتویەتی: "لەگەڵ ترەمپ-ی دۆستمدا دیالۆگێکی بەهێز و دڵسۆزانەمان هەیە. جا چی لەسەر پرسە ناوچەییەکان یان ئەو پرسانەی پەیوەستن بە هەردوو وڵاتەوە بەردەوام لە پەیوەندیداین. لە ماوەی داهاتوودا ئەو دیالۆگە نزیکەی هەمانە بە سەردانێکی بەرێز ترەمپ بۆ وڵاتمان دەیگەیەنین بە لووتکە".

رەجەب تەیب ئەردۆغان ئاماژەی بەوەدا کە هەردوو وڵات لەسەر ئاستی سیاسی، ئابووری و سەربازیدا پەیوەندی بەهێزیان هەیە و وتی: "لەهەر گفتوگۆیەکماندا، زیاتر جەخت دەکەینەوە لە پاڵپشتییەکانی هەردوولا بۆ بەرەوپێشبردنی هاریکارییەکانی نێوان هەردوو وڵات. لەو بڕوایەدام لە گفتوگۆی ئەمرۆشماندا بەهەمان هەستەوە کۆبوونەوەکە کۆتایی پێ دەهێنین".

سەرکۆماری تورکیا، رەجەب تەیب ئەردۆغان لە درێژەی قسەکانیدا رایگەیاند کە تورکیا لە هەموو قەیرانەکانی ناوچەکەدا سەرەڕای هەموو ئاستەنگییەکان سەقامگیری و هێزی ئابووری و سیاسی خۆی پاراستووە و وتی: "ئەمڕۆ وڵاتمان لە بواری توانای کڕیندا ١٣هەمین گەورەترین وڵاتی جیهانە و پێنجەهەمین وڵاتی ئەورووپایە. لە رووی ئەو دەزگا و لایەنانەی وەبەرهێنان دەکەن لە وڵاتەکەماندا، دەوڵەمەندییەکی هاوچەشن بوونی هەیە. چونکە لە رووی ئاسانکاری کارکردن و وەبەرهێنانەوە تا بڵێی وڵاتێکی سەرنجڕاکێشمان هەیە.

لە گفتوگۆکانی ئەم دواییەماندا لەگەڵ سەرۆک ترەمپ باسمان لە ٧٥ ملیار دۆلار کردبوو وەک قەبارەی بازرگانی، بەڵام دواتر لە گفتوگۆکانمان لە ئۆساکا لەگەڵ جەنابیاندا گەیشتنە ئەو رێککەوتنەی ئەمە بگەیەنین بە ١٠٠ ملیار دۆلار. هەنگاوی شێلگیرانەشمان ناوە بۆ گەیشتن بەم ئامانجە".

سەرکۆماری تورکیا ئاماژەی بەوەدا کە تورکیا گرنگییەکی زۆر دەدات بە وەبەرهێنە ئەمریکییەکان کە هەلی کاری باشیان رەخساندووە و ئاشکرای کرد کە لەسەروو هەزار و ٨٠٠ کۆمپانیای ئەمریکی لە تورکیا چالاکی دەنوێنن.

رەجەب تەیب ئەردۆغان ئاماژەی بەوەشدا کە لە نێوان ساڵانی ٢٠٠٢-٢٠١٨دا، بەبڕی نزیکەی سەرجەم ١٢ ملیار دۆلار وەبەرهێنان لە تورکیا کراوە کە سەرچاوەکەی راستەوخۆ ئەمریکا بووە.


AM:09:48:11/09/2019




ئه‌م بابه‌ته 280 جار خوێنراوه‌ته‌وه‌‌