نەوەی نوێ: پێویستە سنوورەکان بکرێنەوە و ئازوقە بۆ خەڵکی رۆژئاوا بنێردرێت

نەوەی نوێ: پێویستە سنوورەکان بکرێنەوە و ئازوقە بۆ خەڵکی رۆژئاوا بنێردرێت
مەوداپرێس-

جوڵانەوەی نەوەی نوێ راگەیاندراوێکی سەبارەت بە هێرەشەکانی سوپای تورکیا بۆسەر رۆژائاوای کوردستان بڵاوکردەوە رایگەیاند هێرشەکانی سەر رۆژئاوای کوردستان بە دەستدرێژیی و هەڕەشەیەکی مەترسیدار دەزانن.

لە راگەیاندراوەکەدا داوا دەکات "لەبری هەڵوێستی میدیایی، سنوورەکان بکرێنەوە و ئازوقە  بۆ خەڵکی رۆژئاوا بنێردرێ".

هەر لە راگەیاندراوەکەدا هاتووە "پێویستە هێز و لایەنەکان کۆبوونەوەیەکی بەپەلە ئەنجام بدەن بۆ وەرگرتنی هەڵوێستێکی نیشتیمانیانەی بوێرانە".

دەقی راگەیاندراوەکە..

"نەوەی نوێ داوادەکات لەبری هەڵوێستی میدیایی، سنوورەکان بکرێنەوە و ئازوقە  بۆ خەڵکی رۆژئاوا بنێردرێ"

دەربارەی ئەو هێرشانەی سوپای تورکیا بۆسەر رۆژئاوای کوردستان دەستیپێکردووە، ئێمە وەک نەوەی نوێ ئیدانەی ئەو هێرشانە دەکەین و بە دەستدرێژیی و هەڕەشەیەکی مەترسییداری دەزانین بۆ ئاڵۆزکردنی زیاتری ڕەوشی ناوچەکەو ئاسایشی جیهانیی.

لەئێستادا ئەم هێرشانە، ناوچەکە، هەروەها  ئەزموونی رۆژئاوا و تەنانەت هەرێمی کوردستانی عێراقیشی خستۆتە بەردەم دوڕیانێکی مەترسییدارەوە، ئەگەر بەوریاییەوە مامەڵەی لەگەڵدا نەکرێت ئەوە دەرچوون لێی ئەستەم دەبێت. 

وەک نەوەی نوێ، روومان لە حکومەت و پارلەمانی کوردستانە، بەرپرسیارانە مامەڵە لەگەڵ ئەم پێشهاتە نوێیەدا بکات و هەڵوێستی روون و ئاشکرایان هەبێت بەرامبەر ئەو هێرشە ناڕەوایانە و دەستبەجێ هاوکارییکردن و پشتییوانیی و هەنگاوی کردەیی پێشکەش بکەن، لە دابینکردنی ئازوقەوە تا کردنەوەی سنوورەکان بەڕووی خەڵکی رۆژئاوادا. 

هەروەک پێویستە لەبری درووشم و هەڵوێستی لاستیکیی دەستبەجێ و راستەوخۆ رۆڵی کاریگەر و ئاشکرایان هەبێت.

هەروەها بەپێویستی دەزانین هێز و لایەنە سیاسییەکان دور لە بەرژەوەندیی و کێشە و ململانێی بچووکی حزبایەتیی، کۆبوونەوەیەکی بەپەلە ئەنجام بدەن بۆ وەرگرتنی هەڵوێستێکی نیشتیمانیانەی بوێرانە و راشکاو لەسەر ئەم لەشکرێکیشیانە کە چوونەتە قۆناغێکی ئێجگار ترسناکەوە،  ئەمەش بۆ دەربازبوون لەو مەترسییانەی رووبەرووی ناوچەکە بەگشتیی و رۆژئاوا بەتایبەت بۆتەوە و دەرئەنجامی ئەو مەترسیانەش لە ئایندەدا بەشێوەیەکی کۆنترۆڵنەکراوتر دێنەپێش.

جوڵانەوەی نەوەی نوێ - ٢٠١٩/١٠/١٠


PM:12:07:10/10/2019