کاڵا و شمەکێکی زۆر لە ئەندەنوسیاوە هاوردە دەکرێت

کاڵا و شمەکێکی زۆر لە ئەندەنوسیاوە هاوردە دەکرێت
مەوداپرێس

سەرۆکی یەکێتی هاوردە و ناردنکارانی هەرێمی کوردستان دەڵێت "هاوردەکردنی کاڵا و شمەک لە تورکیا کەمی کردووە بەڵام هیچ پێداویستییەک لە بازاڕ کەمی نەکردووە".

مستەفا شێخ عەبدولڕەحمان سەرۆکی یەکێتی هاوردە و ناردنکارانی هەرێمی کوردستان سەبارەت بە جێگرەوەی هاوردەکردنی کاڵای تورکی بە مەوداپرێسی راگەیاند "وەفدێکی هەرێمی کوردستان سەردانی ئەندەنوسیای کردووە و ئێستا بڕێکی زۆر باش کاڵاو شمەکمان لەو وڵاتەوە بۆ دێت و هەریەکە لە سعودییە و ئیمارات و وڵاتە ئەوروپییەکان هاوردەمان هەیە".

مستەفا شێخ عەبدولڕەحمان وتیشی "ئێران و چین پێشەنگترینی  ئەو وڵاتانەن کە بە پلەی یەکەم کاڵاو شمەکیان لێ هاوردە دەکرێت".

سەرۆکی یەکێتی هاوردە و ناردنکارانی هەرێمی کوردستان دەشڵێت "هەوڵدەدەین زۆرتین ئەو کاڵایانەی لە ناوخۆ هەیە کەمترین هاوردە بکەین و بە بازرگانەکانیشمان راگەیاندووە کە کەمترینی ئەو کاڵایانە هاوردە بکەن کە خۆماڵییەکە پێداویستییەکانی ناوخۆ پڕدەکاتەوە".

وتیشی "ئێستا چیمەنتۆ تەواوی پێداویستییەکانی ناوخۆ پڕدەکاتەوە و هەناردەی تەواوی شارەکانی عێراق دەکەین".





PM:10:22:06/11/2019