حکومەتی عێراق لەڕووی ئەخلاقییەوە کۆتایی هاتووە

حکومەتی عێراق لەڕووی ئەخلاقییەوە کۆتایی هاتووە
مەوداپرێس

ئەندامێکی خولی چوارەمی پەرلەمانی کوردستان دەڵێت "عادل عەبدولمەهدی ئێستا باجی باشبون و چاوپۆشی کردن لە کورد دەدات و خۆپیشاندەرانی عێراق بەبێ دەستکەوت ناڕۆنەوە".

شێرکۆ حەمە ئەمین ئەندامی خولی پێشوی  پەرلەمانی کوردستان بە مەوداپرێسی راگەیاند "دۆخی ئێستای عێراق و بینینی ئایندە ئاساننیە، بەڵام بە بۆچونی من دوای کوژرانی ٣٠٠ خۆپیشاندەر و برینداربونی زیاتر لە ١٢هەزار ئەو خەڵکە بەبێ دەستکەوت ناڕواتەوە و لە روی ئەخلاقیەوە حکومەتی بەغدا کۆتایی هاتووە تەنها لەروی سیاسی و کارگێڕییەوە ماوەتەوە".

شێرکۆ حەمە ئەمین دەڵێت"سەرۆک وەزیرانی عێراق رەنگە ئێستا باجی باشبون و چاوپۆشی کردن لە کورد بدات، من پێم خۆشە هەموو هاونیشتیمانییەکی کوردستان گوزەرانیان لە هاوڵاتیەکی سوید باشتر بێت، بەڵام ئەم دەستەڵاتدارانەی کوردستان داهاتەکە نادەن بە هاوڵاتیان و بۆ بەغداشی ئاشکرا ناکەن".

نەمانی عادل عەبدولمەهدی کورد زەرەرمەندی یەکەم نابێت ؟ شێرکۆ حەمە ئەمین وتی "کورد ئەگەر دەیەوێت ببێت بە شت نابێت بەم شێوەیە بەردەوام بێت، کە پارە نەدات،  داهاتی گومرگەکان و ژمارەی پێشمەرگە ئاشکرانەکات، بە بیانوی یەکێک لەسەرۆک وەزیرەکانی عێراق نەرم بێت لەگەڵی پەندێکی کوردی هەیە دەڵێت، گۆشتی رانی خۆت بخۆ لە منەتی قەساب باشترە".

ئەندامپەرلەمانەکەی خولی پێشوی کوردستان وتیشی "حکومڕانی کوردی دەبێت لەڕووی ئابوری و سەربازی و متمانەوە هێندە بەهێز بێت باکی بەو کەسە نەبێت کە لەبەغدا حکوم دەکات، بەڵام ئەم دەستەڵاتەی ئێمە حکومڕانی ناکەن و خزمەتی هاوڵاتیان ناکەن، تەنها بەفێڵ و تەڵەکە دۆخەکە ببەن بەڕێوە".




PM:08:26:07/11/2019