ماکرۆن لەکۆشکی ئەلیزێ چی بە قوباد تاڵەبانی وت؟

هاودین مەحمود

رۆژی ٢٠١٧/١٢/٢ ئیمانوێل ماکرۆن سەرۆکی فەرەنسا لە کۆشکی ئەلیزێ پێشوازی لە نێچیرڤان بارزانی و قوباد تاڵەبانی بە ئاڵا و نووسینی کوردیەوە کرد، کە یەکەم سەردانیان بوو لەدوای ئەنجامدانی ریفراندەم و سزاکانی حکومەتی عیراق و وڵاتانی ئیقلیمی و جیهانی بەرامبەر هەرێمی کوردستان کە ئەرز و ئاسمانیان بەڕوودا داخستین و دووپاتکردنەوەی پشتیوانی دووەمین وڵات بوو لە دوای ئەمریکا بۆ هەرێمی کوردستان و هەردوو سەرکردە گەنجەکە.

دوابەدوای وتارەکانیان و لە رێرەوی هۆڵی کۆشکی ئەلیزێ بەدەم رێگاوە ماکرۆن روو لە قوباد دەکات و پێی دەڵێ مستەر تاڵەبانی ئاگاداری ناوخۆی حزبەکەتان (یەکێتی نیشتیمانی کوردستان)بن.

ئەم هۆشیارییەی ماکرۆن سەرۆکی وڵاتێکی زلهێزی جیهان و سکانپاوەری یەکێتیی ئەوروپا دەرخەری بەهێزیی و رۆڵی گرنگی ئەو حزبەیە لە گۆرەپانی سیاسی کوردستان و عیراق و زەقبوونەوەی کێشە و ململانێکانی ناو حزبەکە لەسەر زیاتر پاوانکردنی دەسەڵات و پشک پشکێنە و مسۆگەرکردنی کوڕ و نەوەکانیان بۆ ئێستا و داهاتوو.

ئەمڕۆ پاش یەک ساڵ و هەشت مانگ نێچیرڤان بارزانی وەک سەرۆکی هەرێم لە هەمان کۆشک (ئەلیزێ) پێشوازی لێدەکرێ، قوباد تاڵەبانی پێنج ساڵ لەمەوبەر و دەقیق لە ٢٠١٤/٦/١٨ بە ٩٢ دەنگی بەڵێ ی پەرلەمانتاران و تەنها ٣ دەنگی دژ متمانەی پێدرا لەکاتێکدا نێچیرڤان بارزانی ٩٠ دەنگی پشتیوانی بەڵێ و ٣ رەتکردنەوەی وەرگرت.

لە دانیشتنی ئەمڕۆی پەرلەماندا مەسرور بارزانی ٨٨ و قوباد تاڵەبانیش ٧٣ بەڵێیان بەدەستهێنا هەرچەندە پرۆسەکە جۆرە تەوافوقێکی لەسەر کرابوو، بەڵام چاوەڕوان نەکراوبوو و نیگەرانی بەشێکی زۆری کادیر و ئەندامانی یەکێتیی لێکەوتەوە کە ئەمەیش دەرئەنجامی گەلێک هۆکارە، کە بەشێکی کەمی خۆدی کاک قوباد لێی بەرپرسیارە و ١٨٢ هەزار دەنگی هەڵبژاردن گەواهیدەری ئەم راستیەیە ، وەلێ پشکی شێر بەر سەرکردایەتی یەکێتیی دەکەوێ کە موهتەم نیە بە دەرئەنجامی هەڵبژاردن و ئەم دۆخە نا ئاساییەی یەکێتی کە هیچ کەس ئاواتی پێ ناخوازێ، ئێستا لە هەموو کات پێویسترە یەکریزی نێوماڵی یەکێتی بە کردار نەک تەنها بەگفت بپارێزرێ و ئەو بێزاریی و بێ هیوابوونەی ئەندامان و کادیرانی حزبەکە بە هەر میکانیزمێک بێت بڕەوێندرێتەوە کە هاوڵاتیەکی ئاسایی هەتا سەرۆکی وڵاتانی زلهێزی جیهان و ئیقلیمی درکیان پێ کردوە و هەرجۆرە نەکسەیەکیتر ئەمان لێی بەرپرسیارن.

چاوەرێی دەکرێ کاک قوباد کە پیاوێکی ووردە و لێکدانەوە و ڕوئیای بۆ ئەم پرۆسەی دەنگدانە وەک باقی ڕووداو و گۆرانکارییەکانیتر بەهەند وەربگرێ و لەسەر سیاسەت و نەهجی مام جەلال و تێزی رەخنە و رەخنە لەخۆ گرتنەکەی پەیڕەو بکات و ئیعادەیەکی نەزەر بۆ ناوخۆ بە رەچاوکردنی هەلومەرجی ناوچەکە و گۆرانکاری و پێشهاتە سیاسیەکان و تێگەیشتن لە سیاسەتی وڵاتان بکاتەوە.

PM:11:08:10/07/2019




ئه‌م بابه‌ته 10180 جار خوێنراوه‌ته‌وه‌‌