ئەگەر من دەبام

ئەمەل جەلال

ناونیشانێک زۆر هەڵدەگریت شیکردنەوە و هەڵسەنگاندنى بۆ بکرێت ودواتر هەڵوێستە لەسەردەرئەنجامەکانى بکریت ،ناونیشانێک لە وانەیە لاى زۆرێک مایەى پێکەنین وسەرسوڕمان بێت   بەڵام لاى منى ژن دەیان پرسیارى بێ وەڵامم لا دروست دەکات بۆیە دەپرسم (ئەگەر من دەبام لە شوێنى ئێوە ! ) ئێوەى سیاسى- ئێوەى حوکمڕان ودروستکەرى بڕیار و چارەنووس، ئێوەى سەرکردەو ڕابەر ئێوەو ئێوەو ئێوە...بە دەیان و سەدان ناونیشان و پۆست و پێگە و دەستڕۆیشتویی ...... لە سەر  هەموو شتێک ئێوەن کە بەرپرسیاریتیتان هەڵگرتوە و خاوەندارێتى لە پرسێکى بچووکەوە تا پرسێکى گەورەو چارەنووساز....

مێژووى کۆن و ئێستا و ڕابردوو هەڵسەنگێنن و لێکدانەوەو بەراوردى بکەن لەگەڵ ئەو مێژووەى ئێستا بۆ نەوەکانى داهاتوو بەجێی دیڵین پیمبڵین ئێوە چیتان گۆڕى و چ جیاوازیەکتان بەرهەم هێنا جگە لە دوبارە کردنەوەى هەمان مێژوو هەمان چارەنووسى بێ کۆتایی ، نەوەى ڕابردوو ئیستاش هیچ وانەیەکتان لە مێژوو وەرنەگرت هەمان میتۆدو عەقڵیەت و بیرى تەسکى حزبایەتى و عەشیرەتگەرى و هتد.. دوبارەو دەبارەتان کردووە.

کەواتە پێم ناڵین ئێوە خەریکى چین بۆیە دەڵێم ئەگەر(من بام لە شوێنى ئێوە) فلاش باکێکم بە هەموو ڕوداو و بەسەرهات و کارەسات و قوربانیەکانى شۆڕشە یەک لە دوا یەکەکانم ڕیز دەکردو دەمهێناوە سەر مێزى نیشمانى بریندار و بەش بەش کراوم برینەکانم دەکولاندەوە بۆ ئەوەى ئازارەکانى ڕابردووم ویژدانم بە ئاگا بێنێتەوە لەوەى چى ڕوو دەدات و وانەیەکى لێ فێربم کە هیچ کات فێرى نەبوین.

بەداخەوە مێژوومان پڕیەتى لە تاقیکردنەوەو ئەزمون کردن  تاقیکردنەوە و دوبارەکردنەوەى ڕوداوەکانى مێژوو ، هەرجارەو بە دوبارەکردنەوەى مێژوویەکى تاقیکراوەى تر بە پاسا و بیانوى لێکچوو و تۆمەت و تاوانبارکردن و تخوین و شەڕى براکان کە بەرهەمى مێژویەکى وەستاوە دەڕوانێتە ئایندەیەکى نادیار.

بۆیە گومانم هەیە ئێوە بەو مێژووە ئازار بچێژن دەنا چۆن دەتوانن هەمان مێژوو تیایدا بژین و ڕابردوو وانەیەک و ڕاچڵەکینێکى تیا دروست نەکردن تا روحى نەتەوەیى و نیشتمانى لە تاک بە تاکى کۆمەڵگا بچەسپێنن ،ئێوە وەک ئێمەى ( ژن- دایک – هاوسەر – خوشک مامۆستا هتد ) هەست بەخەم و بەرپرسیارەتى ناکەن ، لەو ئازارە تێناگەن کە لە دوبارەبوونەوەى ئەو مێژووەدا چەند دڵ سوتاو تێکشاوین ئازارى بینینى مناڵیک بە ساڵاچویەک لاوێک کە بۆ ژیان دەڕوانێت،  لە دەستدانى جگەر گۆشەو خۆشەویستەکانمان... بۆیە ئەمانە و سەدان تراژیدیا کە بووەتە ناسنامەمان !!!

چۆن دەکرێت تا ئێستاش بەرپرس و حزبەکان گەورەتر بن لە پیرۆزى خاک و گەلەکەمان ئەگەر دەڵێن وانیە ئەى بۆچى تا ئیستاش ئاوازو دەهۆڵى حزبایەتى و حزب اڵاوحد کاسى کردوین و بەم ڕۆژگارە  گوێچکەکانمان پڕبوە لە شاباشى ئێوە ، لاریمان نیە شاباشتان بکەین ئەو کاتەى دەبنەوە پێشمەرگە گیان فیداکارەکانى تەمەنى جوانى خۆیان بەخشیە نیشتمان . 

بۆیە ئەگەر من دەبام لە شوێنى ئێوە :
"بەرەیەکى نیشتمانى دروست دەکەم بە بەشدارى تەواوى حزبەکان لە بچوکترینیانەوە لە ڕوى دەنگ نەک بەهاى سیاسى.
_ بۆ ماوەى (10) ساڵ هەڵبژاردن لە کوردستان ڕادەگرم بۆ ئەوەى ئینتما بۆ نیشتمان بگێڕمەوە نەک بۆ حزبایەتى . 
_ نوسینەوەى دەستورێکى کوردستانى (عەلمانى ) کە تەواوى بەها مرۆڤایەتى و مەدەنى و یاساییەکانى هاوڵاتیان دەستەبەر بکات بێ جیاوازى ڕەگەزى ، ئاینى ، ئیتنى .
_ بایکۆتى کاڵاى دوژمنانى نیشتمان دەکەم و هاولاتیانم هاندەدەم بۆبەکارهێنان و ژیاندنەوەى  بەرهەمى خۆماڵى هاوکارى و هاوبەشى لە ئەرک و مافدا دەچەسپێنم .
_ گرنگى بە کەرتى کشتوکاڵى و گەشتیارى دەدەم .
_ هێزى پێشمەرگەى کوردستان یەک دەخەم و کار بۆ ڕێکخستنى ژیان و کەرامەتى خێزانەکانیان دەکەم .
_ وزە و دەستى کارى لاوان لە کچان و کوڕان ى کوردستان دەخەمەکارو سود لە تواناکانیان دەبینم .
_ هێزى لە کارخراوەى ژنان کە نیوە زیاتر پێک دێنن دەخەمە گەڕو دەیانپارێزم لە هەموو شیوازەکانى توندوتیژى و هەراسانکردن و ئیستیغلال کردن و پەراوێزخستن.
_ میدیایەکى نیشتمانى دادەمەزرێنم کە تەنها دەنگ و رەنگى کوردستان و سیاسەتێکى میدیایی نیشتمانى پەیڕەو بکات دور لە رەنگ و دەنگى حزبایەتى .
_ پەروەردەو فێرکردن دەکەمە بنەماى دروستکردن و بەرهەمهێنانى نەوەیەکى ئازادو باوەڕبەخۆو بە نیشتمان .
_ دادپەروەرى و سەروەرى یاسا و یەکسانى نێوان هەردوو ڕەگەز بنەماى کارەکانم دەبوو .
_ سزاى توندى هەموو ئەوانەم دەدا کە چاویان بڕیوەتە نیشتمان و زیانى پێدەگەیەنن .
_ شەفافیەت لە داهات و خەرجى و پرنسیبى دامودەزگاکانم دەبوو .
_مافى منداڵان و بەساڵاچوان و کەمئەنداممان و زیندانیانى سیاسى و کەمئەندامانى سەنگەرى کوردایەتى خانەوادەى شەهیدان لە پێشینەى کارەکانم دەبوو .
ئەمانەو دەیان ئەرکى تر لەگەڵ خەڵکە دلسۆزو نیشتمان پەروەر کارمان لەسەر دەکرد بۆیە دەمەوێت بڵیم بە ناوى زۆرینەى ژنانى کوردستانەوە ئەگەر ئەو دەسەڵات و دەرفەتەى بۆ ئێوە ڕەخسا بەدەست ئێمەوە بوایە هەموو ئەوانەى سەرەوەمان دەکردە ڕاستیەکى بەرجەستەکراوو بناغەى دەوڵەتى کوردستانمان دروست دەکرد . ئەى ئێوە بۆ نەتان کرد ؟؟؟


PM:01:19:25/10/2019