هەشت ئەڵقەی تر لە (یاداشتەکانی حزبییە رۆمانسییەکە 25-32)

ستران عەبدوڵڵا

(25)
ئاراستە و گوتاریان هەیە کە ئاسمان و رێسمانیان فەرقە و پێچەوانەی یەکە ، کەچی گلەیی دەکەن بۆچی سەکۆ و مینبەرەکانی حزب ناتوانن تەعبیریان لێ بکات. لەبەر خودپەسەندی کیسەیان بۆ دەیان سێبەر و لاکۆڵان کردۆتەوە کەچی دەپرسن بۆچی دامەزراوەکانی حزب ئەرکی خۆیان جێبەجێ ناکەن کە بەدڵی ئەوان بئاخڤن. سەد کون و درزیان لەدامەزراوەکان کردووە و هێشتا دەڵێن خەڵک بۆیە نارازیین چونکە دەهۆڵ وزوڕنای خۆشیان بۆ ناژەنن.

(26)
واز لە خەڵکی تر بێنن کە چی دەکەن و چۆنی هەڵدەبژێرن؟ با خەریکی مەیدانی خۆمان بین داخۆ چۆنی دەگوزەرێنین؟ 
هەمیشە خۆمان پێ نموونە و مۆدێلی باشترە،  کەواشە ، جا دەبێ بە کردەوە بیسەلمێنین لەوان چاکتر، باشتر و نوێتر و ئایندەخوازتر دەبین . ئەگەر ئێمە کۆنگرەیەکی سەرکەوتوومان کرد، نوێمان کردەوە و خوێنی تازەمان هێنایە پێشەوە دڵنیابن بانگەوازی راستگۆیانەمان  بۆ ماڵە گەورەکە و بۆ دروستکردنەوەی هاوسەنگی  هێز سەرکەوتوو دەبێت. کە ئێمە نوێمان کردەوە و خڕمان کردەوە،  هێزی کەمەندکێشی داهاتوو دەبین. کە پێشمان نەکرا کێشەو کەموکوڕی خەڵکی تر و هێزی تر ناتوانێ شەفاعەتمان بۆ بکا و بیانووی مانەوەمان بداتێ.  کەمەندکێش بن ، تا لە پێشبن

(27)
ناو گوزارشتە  لەناوەرۆک . ناوی یەکێتی ئاماژەیە بۆ یەکێتی جیاوازی و ئاراستەکان نیشانەیە بۆ ویست و داخوازی دیموکراسیانە کە یەک یەکێتی کۆی دەکاتەوە. یەکێتی نەک یەکی، ئیتیحاد نەک وەحدە. بۆیە هەر پێکەوەییەک    بۆ راگرتنی ئەم هاوسەنگییەیە:  جیاوازی و یەکێیەتی، دیموکراسی و سەنتەرێتی. هیچیان بێ ئەویتر نابێ و لاسەنگی نابێ ببێ. 
تەنانەت ئیتحادیی عێراقیش لەسەر تێزی یەکێتی دەبوا وابێ ، کە وانەبوو فیدرالی نەما و باقی چیرۆکەکە ئەمرۆی عێراقە کە راکێش راکێشێکە نەبێتەوە. 
یەکێتی بۆ ئەمە خاسە و کەمەندکێشە کە سەرەتای هاوسەنگی و ئاوێتەیی بێت.

(28)
پێکەوە خەبات دەکەین  چونکە ئامانجی هاوبەش کۆمان  دەکاتەوە ، چونکە بەتەنها پێمان ناکرێ و هێزمان لە پێکەوەبووندایە. دەڵێین لە پێکەوە بووندا نەک لە قەرەباڵەغی کە نیشانەی جیاوازی ئامانج و بەر یەککەوتنە. ئەگەر جیاوازییەکان سەر بکێشێ بۆ سەر شکاندن تا ئەوەی رکابەرەکانمان دەرەقەتمان بێن و پێمان بوێرن ، ئێ خوا نەخواستە جۆبڵاوکردن باشترە.
کەواتا پێش هەموو شتێک دەبێ ئەو ئامانجە هاوبەشانە ئەبدەیت بکەینەوە.ئەمەیە کە ئەدەبیاتی جاران پێیان دەوت دەست بە ئەڵقەی ناوکۆیی خەباتەوە بگرین. کۆنگرە بە ئامانجی هاوبەش سەروەرمان دەکاتەوە

(29)
بە پێچەوانەی بیری باو لە وڵاتی ئێمە تەنگژەی هەرە گەورە نەمانی سەنگی حزب ‌و نەریتی حزبایەتییە، دیموکراسی بێ حزبایەتی وەک شایی ‌و گۆڤەندی بێ بووک ‌و زاوایە . ژیانی سیاسیی بێ ژیانی حزبی گەڕە لاوژێ ‌و عەدەمێکی سیاسیی بێ کۆتایە. سیستمی دیموکراسی،  بە پەرلەمان ‌و ئاڵۆگۆری دەسەڵاتەوە ، قەت تەندروست نابێ ئەگەر حزبایەتی پتەوی نەکات ‌و نەیپارێزێ. حزبایەتی چاودێری چاوتیژە لە بەرامبەر لادان ‌و بە لارێداچوونی هەر سیستمێکی سیاسیی.

 (30)
 ئامانجی سیاسی  ‌و ئەرکی نیشتمانی ‌و نەتەوەیی هاوبەشی حزب دەبێ بە دەستەجەمعی جێبەجێ بکرێت،  بە رەچاوکردنی ئاستی مەسئولیەت ‌و هەرەمی بەرپرسیارێتی. ئەگەر کەسانێک هەبن ئەو ئەرکە باش جێبەجێ نەکەن، یان خاوخاویی تیا دەکەن،  پێویستە بزانن لە شوێن ‌و ناونیشانی ناڕەوان ‌و ئەستێرەکانی سەرشانیان هاوشانی ئەرکەکانی سەرشانیان نییە ‌و زۆر بڕوات رەونەقی جارانی نامێنێ. ئەوانەشی ئەم ئەرکانەیان دڵسۆزانە و بە زیادە کردووە جێی سوپاس و پێدانەوەی متمانەن .
کۆنگرەی دیموکراسیی و نوێبۆوە بۆ ئەوە باش و پێویستە.

(31)
دیموکراسیی شایان ‌و سەنگین ئەو دیموکراسییەیە کە حزبایەتی دەیبزوێنێ ‌و رکابەری فیکری ‌و ئایدیۆلۆژی تیا دەکرێت. بێ ئەوە تەڵەکەبازان ‌و کوڕی رۆژ ‌و پۆلپۆلیستەکان شانۆی سیاسەتی گشتی وڵات داگیر دەکەن ‌و لە فەلاکەتێکەوە بۆ یەکێکی تری دەبەن. ژیانی حزبایەتی جێگیر رێگە لە چەتەبازی ‌و چەنەبازی سیاسیی دەگرێت. لەبەر ئەمەیە دەبێ خەمی حزب ‌و حزبایەتی بخۆین و کۆنگرەکان دەتوانن ئەم پرسە تاوتوێ بکەن

(32)
ئەگەر ژیانی حزبایەتی تەندروست ‌ناوەرۆکی دیموکراسیی بەدەنەی حزب ساغلەم نەکات دەزگا رەسمییەکانی وەک حکومەت ‌و پەرلەمان ‌و دەزگای دادوەری و ئەنجومەنی شارەوانییەکان بە تەنها ناتوانن سیستمی دیموکراسیی پایەدار بکەن.  بەس حزبەکان ‌و حزبییەکان موددەعی راستەقینەن بەسەر پرۆسەی دیموکراسی هەر وڵاتێکەوە. چونکە حزب و حزبییەکان دەبنە چاودێر و رکابەر بەسەر ئەزموونی یەکترییەوەو بەمەش دیموکراسیی دەپارێزن.





PM:01:46:06/10/2019