دەرفەتێکى گرنگ بۆ رۆژئاواى کوردستان

نەرمین عوسمان

کاتێ هێزە سەربازییەکانی ئەمەریکا چوونە ناو خاکی سوریا نە پرسیان بە کورد کرد نە لەبەرچاوی رەشی کوردیش بوو، بەڵکو لەپێناو ئەجندایەکی تایبەت بە خۆیان بوو، هەروەها کە چووە دەرەوەش نە گۆێیان بە کورد و نە بەلاشیانەوە گرنگە کام چارەنووس چاوەڕێی کورد دەکات، بەپێچەوانەوە گڵۆپی سەوزی بۆ سنوور بەزاندنی سوپای تورکیا هەڵکرد.

ئەمریکا بە ئاشکرا وتوویەتی بۆ شەڕی لە ناوبردنی گروپی تیرۆریستیی داعش هاتووە، رەنگە جگە لەو ئەجێندایە مەرامی لاوازکردنی پێگەی روسیا و ئێرانیشی لا گرنگ بووبێ، بەڵام بۆی دەرکەوت کە ناتوانێ پێگەیان لاواز بکات، بەڵکو بەهێزتریش بوون، هەر بۆیەشە ئەجێندا ئاشکراکەی کە لەناوبردنی داعش بوو، بەهۆی شەڕڤانانی کورد و هێزەکانی سەر بە رژێمی سوری و هاوکاری هێزەکانی خۆیان ئەم مەرامەیان گەیاندە ئەنجام، ئێستا مانەوەیان لە بەرژەوەندیان نییە لە چەند روویەکەوە، پارساڵیش ئەم بڕیارەیدا، بەڵام لە ژێر فشاری ناوخۆیان هێزێکی 2000 کەسیان هێشتەوە، هەر بۆیەشە بڕیاری دەرچوونیان بە یەکجارەکی چاوەڕوانکراوبو، کوردیش ئیتر ئەو پشتیوانییەی لەو ناوچانە نامێنێ، هێزەکانی تورکیاش بۆ هەلێکی وا دەگەڕان و بۆیانی رەخساند ئەگەر گڵۆپیشی داگیرساندبێ، ئامانجی ئۆردۆغان زۆر دیارە بە لەناوبردنی رەگەزی کورد و هێزە بەرگرییەکانی بە ئاشکرا دەیڵێ و توویەتی و نایشارێتەوە، بۆیە دەبوایە هێزە سیاسیەکانی رۆژئاوای کوردستان لەوە وردتر بوونایە و پێش وەخت بیریان لە بژاردەی دووەم بکردایەوە بەتایبەتی دوای داگیرکردنی شاری عەفرین و کاتێ لەو پەڕی  بەهێزیدابوون، بکەوتنایەتە گفتوگۆ لەگەڵ رژێمی سوریا و لایەنی روسیاش و چاوەڕوانی سیاسەتی ناجێگیری ترامپ نەبوونایە و بەناچاری و لە خاڵێکی لاواز بژاردەی گفتوگۆ لەگەڵ ئەسەد بکەن.

رەنگە تاڵبێ، بەڵام وەک مەزڵوم کۆبانی وتی مانی میللەتێک لایان گرنگترە، ئێستاش ئەمە کۆتایی نییە، بەڵکو دەبێ سەرجەم هێزە سیاسی و سەربازییەکانی رۆژئاوا بە یەک هەڵوێست و بەیەکەوە بچنە سەر مێزی گفتوگۆ و واز لە ململانێی تەسکی حزبایەتی بهێنن و بە نەفەسی رەچاوکردنی بەرژەوەندیی نەتەوەیی و خەڵکی کوردستان و بە چاودێری نەتەوە یەکگرتوەکان و روسیا، ئێستا کاتێکی زۆر لەبارە سۆزی زۆربەی وڵاتان لە گەڵ پرسی نەتەوەی کوردە و ئەم هێرشەی ئەردۆغان بە داگیرکردن و نەژادپەرستی ئەژمار دەکەن.

یەکێتیی نیشتیمانیی کوردستانیش دەتوانێ رۆڵێکی گرنگ ببینێ بەهۆی پەیوەندییەکانییەوە، سوریاش ئامادە دەبێ بۆ جێبەجێکردنی هەندێ لە داواکارییەکان بەمەبەستی گەڕاندنەوەی ئارامی بۆ ناوچەکە و مانەوەیان لەسەر دەسەڵات و پاراستنی یەک پارچەیی سوریا، بەو هیوایەی ئەم جارە قسەی جۆناپان راندڵ کە لە کتێبی (امە فی شقاق) دەڵێ کورد میللەتێکی زۆر ئازان و لەشەڕ براوەن، بەڵام کە دەچنە سەر مێزی گفتوگۆ دەیدۆڕێنن نەچێتە سەر، نەچوونە سەری ئەم قسەیە تەنیا و تەنیا بە یەکڕیزی و یەک هەڵویستی دێتەدی و گرنگ سەرکردایەتى کوردی رۆژئاواى کوردستان ئەم دەرفەتە لەدەست نەدات.

AM:08:41:16/10/2019